Viloyatdagi avtomobil transportida yoʼlovchi va yuk tashish bilan shugʼullanuvchi avtotransport korxonalari rahbarlari DIQQАTIGА!

Oʼzbekiston Respublikasining “Litsenziyalash, ruxsat berish va xabardor qilish tartib-taomillari toʼgʼrisida”gi Qonunining 29-moddasi, “Yoʼl harakati xavfsizligi toʼgʼrisida”gi Qonunining 21-moddasi, Oʼzbekiston Respublikasi Vazirlar Mahkamasining 2021-yil 29-iyundagi “Avtomobil transporti sohasida kadrlar malakasini oshirish va ularni qayta tayyorlash tizimini takomillashtirish chora-tadbirlari toʼgʼrisida”gi 399-son qarori va Oʼzbekiston Respublikasi Transport vazirligining 2021-yil 13-iyuldagi 127-son buyrugʼiga asosan yoʼlovchilar va yuklarni avtomobil transportida tashish faoliyati bilan shugʼullanuvchi yuridik shaxslar xodimlarining bilimi, malaka darajasi va kasbiy mahorati malaka talablariga muvofiqligi Transport vazirligi tomonidan tasdiqlangan maxsus dastur boʼyicha ushbu xodimlarning kamida har uch yilda bir marta oʼz malakasini oshirganligi toʼgʼrisida berilgan malaka sertifikatiga muvofiq aniqlanishi hamda yoʼlovchi va yuklarni avtomobil transportida tashish ushbu sohada kamida uch yil ish stajiga, avtomobil yoki texnik yoʼnalishda oliy kasbiy maʼlumotga va malaka sertifikatiga ega xodimi mavjud boʼlgan yuridik shaxslar tomonidan amalga oshirilishi belgilangan.
Yuqoridagilarni inobatga olib korxonangizda mavjud malaka sertifikatlarini Oʼzbekiston Respublikasi Transport vazirligi qoshidagi Avtomobil transporti xodimlari malakasini oshirish va qayta tayyorlash institutida ((71)231-12-67; +99895-169-44-43; (95)196-44-43. Faks/tel: (71)231-12-68) roʼyxatdan oʼtkazish yoki oʼz xodimlaringizni malaka sertifikati bilan taʼminlashingiz soʼraladi.
Transport vazirligi tomonidan malaka sertifikatiga ega xodimi mavjud boʼlmagan va sertifikatining amal qilish muddati tugagan yuridik shaxslar tomonidan litsenziya va litsenziya varaqalarini rasmiylashtirib olish imkoniyatlari tizim orqali cheklanishini bildiramiz.